Dadweynaha reer Puntland waa dad walaalo ah oo wada dhashay, loomana kala
qaybin karo reer-reer, soohdimana lama kala dhexdhigi karo. Dadkaani wuxuu
caan ku ahaa ka dhiidhiga xumaanta iyo u ololaynta nabadda, waxayna
ahaayeen kuwii ugu horeeyey ee ku dhawaaqay inay qori kala hortagaan
taliskii naxariis laawaha ahaa ee Ina Siyaad ayagoo midaysan oo garba
siman ah, aragtidoda guudna ay ahayd siday ku soo ceshan lahaayeen
karaamadoodii, sharaftoodii iyo nabadgalyadii ay ku noolaayeen intuusan
Ina Siyaad afganbin maamulkii Somali oo dhammi dhisatay oo xaqqa ku
dhisnaa. Reer Puntland waxaa uga dhintay wiilal iyo gabdho qaali ahaa,
waxay ku waayeen xoolahoodii intoodii badnayd, waxaa waliba la kufsaday
ama la fara xumeeyey qabdhahoodii qurxaha badnaa, ayagoo loo eegin qoys-
qoys ee magac guud loo gumaaday.
Cadowgii sidaas u galay reer Puntland wuxuu bilaabay inuu adeegsado
calooshooda u shaqaystayaal u dhashay Puntland si uu u kala qaybsho oo uu
xoogooda u kala dhantaalo, dabadeedna ugu dhibyaraato siduu u dabargoyn
lahaa, una hooskeeni lahaa xukunkiisii xaqdara ku dhisnaa. Raggii loo
adeegsaday falalkii foosha xumaa ee waxashnimada ahaa waxay dhex galeen
dadkii walaalaha ahaa oo ku midaysnaa aragti qura, ayagoo adeegsana
boorsooyin lacag ah iyo qabiil bay kala furfureen midnimadii, dadkiina
dhexdhigeen mugdi ayagoo u kala qaybshay dadkii wada-dhashay beel-beel iyo
jilib-jilib, taasna waxay keentay dibudhac ku dhacay SSDF iyo hadafkoodii,
waxayna waqtigii u dheeraysay taliskii sii dhimanaayey ee Afweyne oo
bilaabay inuu cunno xirgiraha dadkii kale ee Somaliyeed ee u qabay in
dhibaatadu kali ku tahay reer Puntland oo qura, asagoo boqol-boqol iskugu
xir xiray oo xeebaha ku xasuuqay, qaarkoodna dayaarado ku weeray oo
waxyeelo ba'an u gaystay.
Caadaqaatayaashii naloo adeegsaday iyo kuwa cusub oo ay soo
taba-bareen ayaa maanta oo aan soo ceshanay karaamadeenii, magaceenii iyo
nabaddii naloo soo diray mar labaad si ay u baabi-iyaan waxaan labaatan
iyo sadex sanno u dagaalamayney oo Ilaah mahaddiis noo soo hoyatay;
Waxay maantana doonayaa
inay noo kala qaybshaan reer qurac, reer qansax iyo qoys-qoys, ka dibna na
hoos geeyaan maamul ka xun kii Siyaad oo ay madax ka yihiin haraagii
Afweyne iyo Mooryaan miciin laawayaal ah.Waxay adeegsanayaan lacag iyo
qabiil mar kale siday u kala daadiyaan qaranimada iyo xoogga midaysan ee
shacabkaan wada dhashay oo aan kala maarmin hiil iyo hooba.
Rag baa loo soo dhiibay cudurkaan faafa ee khatarta ah, horayna ugu dhacay
oo lagu soo tigaabiyey walaalaheena Koonfurta iyo Gobolada dhexe ku nool
oo loo kala qaybshay dad wada dhashay oo walaala ah inay kala taageeraan
Ina caydiid iyo Caato oo ay qori isu qaataan.
Marka hore reer Puntland isweydii middaan,
maxay ku dagaalamayaan Caato iyo Ina Caydiid? ma dhul bay kala haystaan?
ma xoolay kala dhaceen? miyeysan ahayn laba qoys oo walaala ah oo hal oday
wada
dhalay? Waxay calooshoodooda u shaqaystayaasha u dhashay Puntland
doonayaan inay inoo kala qaybiyaan sidii Cayr iyo sacad loo kala qoqobay
oo cudur qabiil oo qaab daran loo kala dhex dhigay.
Haddaba dadweynaha waxgaradka ah ee reer Puntland maxaa la gudboon maanta
si ay ku ilaashadaan sharaftooda iyo jiritaankooda? soo ma aha inay wax
walba u huraan dhiig iyo dheefba siday uga hortagi lahaayeen
balaayada lala maagan yahay? mise waxay u kala qaybsami qoys-qoys oo
dhulkooda nabadda ah bay u kala qoqoban Goof-Goof ? Taasna waxay
cimrigooda dheeraynaysaa MICIINLAAWA-
YAASHA Cabdiqaasim madaxda ka yahay oo mar labaaad gumaad iyo ciribtir u
gaysandoona dad aan danbi lahayn.
Waxaan hubaa dadkeena intiisa badan inay ogtahay waxa lala damacsan yahay,
cidina aysan u kala qaybin karin xero-xero, qabiilna layskaga horkeeni
karin ayadoo dano khaas ah lagu fushanaayo, waayo horey u soo arkeen
aragtidaan qaabka daran.
Raage Jaamac
U.S.A
ragejma@aol.com