Ururka horumarinta gobolka jubbada hoose
xarunta stockholm
UHGJH/Q-11/2002
Stockholm, 10/04/2002
- Ku:
- Dhammaan aqoonyahannada iyo wax garadka g/j/hoose.
- Dhammaan haweenka iyo dhalinyaradda gobolka j/hoose.
- Dhammaan gudiyada iyo jaaliyadaha gobolka j/hoose.
- ku:
- Dhammaan Hay'adaha gurmadka iyo gargaarka deg degga ee caalamiga ah
(Dhakhaatiirta aan xuduudda la'hayn. Ururka laanqayrta Cas IWM.)
Ujeeddo:- Fidin Gurmad deg deg ah iyo Badbaadin ummadeed
Walaalayaal, Saaxiibayaal.
( MAANTAY WAA MAALIN AAN LOO KALA HARIN ).
Sida aad la wada socotaan cudurka halista ah ee daacuun caloolaha ah ayaa
fara ba'an ku haya dadka Degmada Afmadow, Dhoobley, Kismaayo iyo guud
ahaan Gobolka Jubbada Hoose iyo Jubbada Dhexeba. Caruur iyo waayeel badan
ayaa u dhintay cudurkaasi. Dad aad u badanna wey u liitaan maanta
cudurkaasi. Waxaana ka dhammaaday gar gaarkii ay hesteen.Wax gar gaar ah
oo ay haysantaan maantay ma jiraan sida ay soo tebiyeen odoyaasha iyo wax
garadka Degmooyinkaasi. Cudurku waa cudur dilaa ah oo markiiba haddii aan
lala gaarin qofkii uu ku dhaco dawo iyo nafaqo deg deg ah uu u dhimanaayaa
si dhakhso leh.
Haddaba, dadka Gobolka Jubbada Hoosow maxaa inagu waajib ah haddii
caruurtayada iyo waayeelkayaga iyo guud ahaanba dadkayaga ay u
dhimanaayaan cudurkaasi halista ah?
Waxaan u malaynaynaa maanta in ay tahay maalin aan loo kala harin sidii
loo badbaadin lahaa dadkayaga ay dhibaatada ka soo gaarayso cudur wax laga
qaban karo ama laga hortegi karo. Qof walba oo Reer Waamo ah bal isku day
in aad badbaadiso qof keliya ( Alle baa badbaado lehee) in aad ku
badbaadiso qiimo aan dhammayn $10 Dolar. Isagoo loogu gadaayo qofka jiran
daawo ama faleebaha nafaqaynta ah oo noloshiisana wax u tari karto.
Walaal, Saaxiib, badbaadi walaalkaa, walaashaa, ehelkaaga iyo dadkaaga
iyo saaxiibadaaba wax aan qiimo badan ahayn ku badbaadi. Ogow haddii aad
ahaan lahayd qofka cudurkaasi uu hayo waxaad dadkaaga uga baahnaan lahayd
gurmad iyo gargaar deg deg ah, sidoo kale adiga maanta u fidi gar gaar
qofka maanta u baahan gar gaarka kuna badbaadi naftiisa. U naxariiso
dadkaaga, si Eebbe kugu naxariisto. Sidoo kale ha iloobin dadka ku nool
Gobolka Jubbada Dhexe oo iyaguna cudurkaasi fara ba'an uu ku hayo gaarsii
gar gaarkaaga iyo deeqdaadaba waa dadkaagiiyee.
Guddiyada iyo Jaaliyadaha dibadda ku noolow, meel kasta oo aad
joogtaanba isu abaabula magaalo, magaalo, degaan, gobol iyo dal dalba
idinka iyo dadka kale ee Soomaaliyeed ee jecel in ay ka qayb qaataan gar
gaarkan deg degga ah ee loo fidinaayo dadka uu baabi'inaayo cudurkan
halista ah ee ku nool Gobollada Jubbada Hoose iyo Jubbada Dhexe iyo meel
kasta oo ay ku dhibaataysan yihiin dadka Soomaaliyeed.
La gaara gar gaarka dadkiinna idinkoo u xilsaaraaya dadkii uruurin
lahaa meelkasta oo aad joogtaanba.
BALLANKEENNU WAA FIDIN GURMAD DEG DEG AH.
Wabilaahi Towfiiq.
Qormadan waxaa Qoray:
Maxamed Muse Cabdi
Guddoomiyaha U.H.G.J
UHGJH@hotmail.com