Qiimahii diigga qofka Soomaaliyeed ha la soo celiyo.
Alla
ha u naxariisto marxuum Dr. Dahir Sh. Xasan oo shalay lagu dilay Xamar.
Dhaqatar
Dahir Sh. Xasan oo shalay latoogtay isagoo u socday goobtii uu dadka ku
daawayn lahaa ayaa ugu danbeeyay qof Soomaali ah oo ku dhintay gacan qof
Soomaali ah. Intaan maqalnay. Inkastoo Dhaqtarka uusan ahayn qof ka
dhintay reerkiisa keliya balse uu ka dhintay Soomaali oo dhan weliba uu
ahaa qof muhiim ah oo daaweeyn jiray dad badan hadana dilka keligii kuma
koobna waxaase intaa ka daran in la yiri waxaa dhaqtarka loo dilay aano
qabiil!!.
Tan iyo intii uu bilowday dagaalka sokeeye waxaa raqiis noqday dhiiga qofa
Soomaaliga ah waxaa caado noqotay dhaca, dilka, sharaf tirka qofka
soomaaliyeed iyo ayadoo mararka qaarkood la kufsado ama la fara xumeeyo
gabdhaha Soomaaliyeed. Waxani waa wax aan hore loo arag heerka sidaas u
liitana taariikhda soomaalida marna ma gaarin mana aha wax ay sameeyaan
dad islaam sheeganaya..
Daadinta dhiiga Soomaalida ayaa ah mid aanay caruur ciroole, haween,
culimo, iyo dhaqaatiirba aanay ka fakanin. Ninkii Soomaali ah oo aan arko
oo uu dhiigiisa ka qaalisanaa ma arag Marxuum Abuu Jeylaani oo ku dhintay
gacanta booliska Minneapolis Minnesota. Marxuumkaas geeridiisa awgeed
soomaalida ku nool gobolka Minnesota oo ka kala timid gobolada Soomaaliya,
Jabuuti, waqooyiga Kenya, Bariga Itoobiya, iyo meelo kaleba waxay
gilgileen Minnesota oo dhan waxay sameeyeen banana baxyo iyo dacwooyin.
Markaad
aragto dalalka qaarkood oo qiimo u yeelaya muwaadiniintooda oo xataa hal
qof haddii laga qafaasho iska daa waaba dil e dagaal u galaya oo aad
haddana fiiriso dhiiga iyo sharfta qofka Soomaaliga aad ayaad u
murugoonaysaa.
Waa
xil qof walba oo Soomaali ah oo wax garad ah saran sidii loo joojin lahaa
ku xadgudubka hantida, sharafta, iyo nafta qofka Soomaaliga ah.
WAA INUU DHIIGA QOFKA SOOMAALIGA AH NOQDAA KAN DUNIDA UGU
QAALISAN_SOOMAALIDA OO ILAAHAY BARYADIISA KAASHATA AYAANA KA DHIGI KARTA.
Mahamoud Nur Wardere
Musharaxii
hore ee duqa magaalada Minneapolis, MN, USA
Wardere1@aol.com